Shravan Special: श्रावणी सोमवारच्या उपवासासाठी १० मिनिटांत करा पांढरेशुभ्र खोबऱ्याचे लाडू

श्रावण महिना सुरू होताच, अनेक घरांमध्ये उपवास, पूजा आणि सणांची तयारी सुरू होते. श्रावणी सोमवारी महादेवाला नैवेद्य दाखवण्यासाठी आणि उपवासाच्या दिवशी तोंडाची चव वाढवण्यासाठी खास गोड पदार्थ तयार केला जातो. या दिवशी बाहेरच्या दुकानांमधून भेसळयुक्त मिठाई खरेदी करण्याऐवजी, घरच्या घरीच गोड पदार्थ तयार करणे अधिक चांगले ठरते. यासाठी एक उत्तम पर्याय म्हणजे खोबऱ्याचे लाडू. या लाडूंची तयारी करण्यासाठी जास्त वेळ लागणार नाही आणि खव्याचीही आवश्यकता नाही. अगदी सोप्या आणि सहज उपलब्ध साहित्याने पांढरेशुभ्र लाडू तयार करता येतात. हे लाडू उपवासातही खाण्यासाठी योग्य आहेत. दिसायला आकर्षक आणि चवदार असलेले हे लाडू तोंडात टाकताच विरघळतात. त्यामुळे, अगदी १० ते १५ मिनिटांत हे लाडू कसे तयार करायचे ते पाहूया.

या लाडूंच्या तयारीसाठी लागणारे साहित्य अगदी सोपे आहे. २०० ग्रॅम डेसिकेटेड कोकोनट, १ लिटर दूध, अर्धा कप साखर, २ ते ३ वेलची, १ ते २ चमचे तूप, आणि बारीक चिरलेले ड्रायफूट्स तसेच ४ ते ५ केसराच्या काड्या लागतील. सर्वप्रथम एका कढईत १ लिटर दूध गरम करायला ठेवा. दूध मध्यम आचेवर उकळून ते अर्धे किंवा घट्ट होईपर्यंत चांगले आटवून घ्या. दूध आटल्यावर त्यात साखर आणि वेलची पूड घाला. साखर पूर्णपणे विरघळेपर्यंत मिश्रण चांगले ढवळा. नंतर, आटलेल्या दुधात डेसिकेटेड कोकोनट घालून मंद आचेवर सतत ढवळत राहा. खोबरे दूध पूर्णपणे शोषून घेईल आणि मिश्रण घट्ट गोळ्याच्या रुपात तयार होईल.