Unemployment in the Country:देशात बेरोजगारी किती? केवढ्या लोकांना नोकरी मिळाली? समोर आली आकडेवारी

जागतिक स्तरावरच्या अनिश्चिततेमुळे आणि एआय तंत्रज्ञानाच्या वाढत्या वापरामुळे भारतात रोजगाराच्या संधींमध्ये गंभीर संकट निर्माण झाले आहे. विरोधी पक्षाचे नेते राहुल गांधी यांनी नुकतेच देशात बेरोजगारीच्या उच्च प्रमाणाबद्दल चिंता व्यक्त केली होती. याच पार्श्वभूमीवर, देशात बेरोजगारीची स्थिती आणि गेल्या वर्षभरात किती लोकांना नोकरी मिळाली याबाबतची आकडेवारी समोर आली आहे. सांख्यिकी मंत्रालयाने संसदेत दिलेल्या माहितीनुसार, गेल्या वर्षभरात रोजगाराच्या संधींमध्ये कोणताही बदल झालेला नाही. म्हणजेच, देशातील नोकऱ्या स्थिर राहिल्या आहेत, ना वाढल्या आहेत ना कमी झाल्या आहेत.

सांख्यिकी मंत्रालयाने दिलेल्या माहितीनुसार, आर्थिक वर्षाच्या एप्रिल ते जून तिमाहीत भारतातील बेरोजगारीचा दर स्थिर राहिला आहे. याबरोबरच, काम करणाऱ्या लोकांची संख्या देखील जवळपास स्थिर आहे. याचा अर्थ असा की, देशातील बेरोजगारीचे आकडे गेल्या वर्षाच्या तुलनेत फारसे बदललेले नाहीत. नवीन आकडेवारीनुसार, या तिमाहीत बेरोजगारीचा दर ५.५ टक्के आहे, जो गेल्या वर्षीच्या ५.६ टक्के दराच्या जवळपास आहे. यावर्षी जून महिन्यात नोकरदार लोकसंख्येचे प्रमाण ५१.४ टक्के राहिले, जे गेल्या वर्षीच्या ५१.२ टक्क्यांच्या तुलनेत थोडी वाढ दर्शवते.