Waterlogging in Singhgad:सिंहगड क्षेत्रीय कार्यालयासमोर पाण्याचा साचलेला तळा

धायरी : सिंहगड परिसरातील नागरी समस्यांचे निराकरण करणाऱ्या सिंहगड क्षेत्रीय कार्यालयाच्या प्रवेशद्वारासमोरच रस्त्यावर मोठ्या प्रमाणात पावसाचे पाणी साचले आहे. या साचलेल्या पाण्यातून सहायक आयुक्तांसह इतर अधिकारी, कर्मचारी आणि नागरिक यांना ये-जा करावी लागते. त्यामुळे नागरिकांना 'दिव्याखाली अंधार' अशी स्थिती कधी बदलणार, असा प्रश्न उपस्थित होत आहे. प्रशासनाच्या निष्काळजीपणामुळे नागरिकांना दरवर्षी भरमसाट कर भरूनही केवळ निराशा अनुभवावी लागते. या समस्यांवर महापालिका आयुक्त व महापौरांनी तात्काळ लक्ष देणे आवश्यक आहे.

सिंहगड कार्यालयाच्या समोर साचलेल्या पाण्यामुळे डासांचा प्रादुर्भाव वाढत आहे, तसेच मुख्य रस्त्यांवर आणि अंतर्गत रस्त्यांवर मोठे खड्डे वाहनधारकांसाठी समस्यांचा कारण बनत आहेत. परिसरातील सार्वजनिक स्वच्छतागृहांमध्ये पाण्याचा अभाव आणि अस्वच्छता आढळून येत आहे. पावसाळ्यातही अनेक भागांना पिण्याच्या पाण्याचा पुरवठा होत नसल्याने नागरिकांना टॅंकरवर अवलंबून राहावे लागते.

पावसाळ्यात नागरिकांना पिण्याच्या पाण्यासाठी वणवण भटकावे लागते, तर रस्त्यावर पाण्याचे डबके साचून डेंग्यू आणि मलेरियासारख्या आजारांचा धोका वाढत आहे. कार्यालयासमोर साचलेल्या पाण्यातून रोज ये-जा करताना अधिकाऱ्यांनी स्वतः आत्मपरीक्षण करणे आवश्यक आहे. महापौर व आयुक्तांनी स्वतः या समस्यांची पाहणी करावी आणि निष्क्रिय अधिकाऱ्यांना योग्य मार्गदर्शन करावे, अशी नागरिकांची अपेक्षा आहे. - महेश पोकळे, सामाजिक कार्यकर्ते