Revival of Pune-Nashik Railway: पुणे–नाशिक रेल्वेच्या मूळ मार्गाला नवसंजीवनी

कुरुळी: पुणे–नाशिक सेमी हायस्पीड रेल्वे प्रकल्पाच्या मूळ मार्गाच्या सिन्नर–संगमनेर–नारायणगाव–मंचर–चाकण या सरळ मार्गाने चालवण्याची मागणी पुन्हा एकदा जोर धरत आहे. राज्य सरकारने या रेल्वे मार्गाच्या संरेखनाचा फेरअभ्यास करण्यासाठी आणि खोडद येथील जायंट मीटरवेव्ह रेडिओ टेलिस्कोप (जीएमआरटी) प्रकल्पावर होणाऱ्या संभाव्य परिणामांचा अभ्यास करण्यासाठी डॉ. अनिल काकोडकर यांच्या नेतृत्वाखाली उच्चस्तरीय समितीची स्थापना केली आहे. यामुळे मूळ मार्गाच्या समर्थकांमध्ये नव्या आशा निर्माण झाल्या आहेत. या पार्श्वभूमीवर, ९ ऑगस्टच्या क्रांतीदिनानिमित्त राज्यभर जनआंदोलनाची हाक देण्यात आली आहे. खेड, आंबेगाव आणि संगमनेर तालुक्यांमध्ये आंदोलनाची जोरदार तयारी सुरू आहे. खेडचे आमदार बाबाजी काळे यांनी नुकतीच या आंदोलनाच्या नियोजनासाठी आढावा बैठक घेतली, ज्यामध्ये शिवसेना (ठाकरे गट) जिल्हाप्रमुख रामदास धनवटे, मी सेवेकरी फाउंडेशनचे अध्यक्ष सुधीर मुंगसे आणि विविध संघटनांचे पदाधिकारी उपस्थित होते. या बैठकीत आंदोलनाच्या योजनेवर चर्चा करण्यात आली आणि स्थानिक नागरिकांच्या भावना समजून घेण्यात आल्या.

पुणे–नाशिक रेल्वे प्रकल्पाचा मूळ डीपीआर २०२० मध्ये मंजूर झाला होता, आणि भूसंपादन प्रक्रियेला सुरुवात झाली होती. तथापि, जीएमआरटीच्या कारणाने रेल्वे मार्ग शिर्डीमार्गे वळविण्याचा प्रस्ताव समोर आला, ज्याला स्थानिक नागरिक, उद्योग क्षेत्र, शेतकरी संघटना आणि लोकप्रतिनिधींनी तीव्र विरोध दर्शविला आहे. मूळ सरळ मार्ग कायम ठेवण्याची मागणी सातत्याने केली जात आहे. खासदार डॉ. अमोल कोल्हे यांनी या संदर्भात आपली ठाम भूमिका स्पष्ट केली आहे. त्यांनी सांगितले की, पुणे–नाशिक सेमी हायस्पीड रेल्वे सिन्नर–संगमनेर–नारायणगाव–मंचर–चाकण या सरळ मार्गानेच व्हावी. जीएमआरटीच्या कारणाने मार्ग बदलण्याचा निर्णय घेतल्यानंतरही त्यांनी लोकसभेत हा मुद्दा उपस्थित केला. जगभरातील अनेक देशांमध्ये रेडिओ दुर्बीण आणि रेल्वे मार्ग एकत्र कार्यरत आहेत, त्यामुळे आधुनिक अभियांत्रिकी तंत्रज्ञानाच्या साहाय्याने जीएमआरटीला कोणताही धक्का न लावता रेल्वे मूळ सरळ मार्गाने नेणे तांत्रिकदृष्ट्या शक्य आहे, असे त्यांनी स्पष्ट केले.