Protest Against Potholes:रस्त्यांवरील खड्ड्यांविरोधात शिवसेनेचे निषेध आंदोलन

वसईतील विरार पश्चिमेच्या ग्लोबल सिटी परिसरात रस्त्यांवरील खड्ड्यांमुळे स्थानिक नागरिकांना मोठा त्रास सहन करावा लागत आहे. या समस्येवर लक्ष वेधण्यासाठी शिवसेना (ठाकरे गट) ने शुक्रवारी खड्ड्यांविरोधात निषेध आंदोलन केले. या परिसरातील रस्त्यांची दुरावस्था झाली आहे, ज्यामुळे वाहतूक अत्यंत संथ गतीने होत आहे. खड्ड्यात साचलेले पावसाचे पाणी आणि रस्त्याची खराब स्थिती यामुळे वाहनचालकांना मोठा त्रास होतो आहे. दुचाकी आणि चारचाकी वाहन चालकांना पाठीच्या, मानेच्या आणि मणक्याच्या दुखण्यांचा सामना करावा लागत आहे. त्यामुळे स्थानिक नागरिकांनी या समस्येवर उपाययोजना करण्याची मागणी केली आहे.

शुक्रवारी उपशहर प्रमुख सागर बाळासाहेब साळुंखे यांच्या नेतृत्वाखाली शिवसेनेच्या कार्यकर्त्यांनी या खड्ड्यांविरोधात आंदोलन केले. आंदोलनकर्त्यांनी महानगरपालिकेच्या कारभाराचा निषेध करत, रस्त्यांवरील खड्डे तातडीने बुजवून रस्ते सुरक्षित करावेत, अशी मागणी केली. या आंदोलनात शिवसेनेच्या पदाधिकाऱ्यांनी एकत्र येऊन रस्त्यांच्या दुरुस्तीच्या मागणीसाठी आवाज उठवला. त्यांनी महानगरपालिकेला इशारा दिला की, जर आठ दिवसांच्या आत खड्डे बुजवले नाहीत, तर ते महानगरपालिका कार्यालयात ठिय्या आंदोलन करणार आहेत.