Mega Block on Sunday:रविवारी मेगाब्लॉक

मुंबई : मध्य रेल्वेच्या मुंबई विभागात आणि पश्चिम रेल्वेच्या मुंबई सेंट्रल विभागात रेल्वे रुळांची दुरुस्ती आणि सिग्नल यंत्रणेत तांत्रिक कामे करण्यासाठी रविवारी मेगाब्लॉक घेण्यात येणार आहे. मध्य रेल्वेच्या माटुंगा-मुलुंड अप आणि डाऊन धीम्या मार्गावर, हार्बर मार्गावरील सीएसएमटी-चुनाभट्टी/वांद्रे अप आणि डाऊन मार्गावर तसेच पश्चिम रेल्वेद्वारे हार्बर मार्गावर गोरेगाव ते वांद्रे अप-डाऊन मेगाब्लॉक घेतला जाईल. या कामामुळे प्रवाशांना काही असुविधा भोगावी लागणार आहे.

माटुंगा-मुलुंड अप आणि डाऊन धीम्या मार्गावर ब्लॉक दरम्यान सीएसएमटी येथून सुटणाऱ्या धीम्या लोकल गाड्या माटुंगा-मुलुंड स्थानकांदरम्यान डाऊन जलद मार्गावर वळवण्यात येतील. या लोकल गाड्या शीव, कुर्ला, घाटकोपर, विक्रोळी, भांडुप आणि मुलुंड स्थानकांवर थांबतील. ठाणे येथून सुटणाऱ्या अप धीम्या मार्गावरील लोकल गाड्या मुलुंड येथे अप जलद मार्गावर वळवण्यात येतील. त्यामुळे प्रवाशांना थोडा त्रास होईल, परंतु हे काम पूर्ण झाल्यानंतर सेवा पूर्ववत होईल.

सीएसएमटी-चुनाभट्टी/वांद्रे अप आणि डाऊन मार्गावर सकाळी ११.१० ते दुपारी ४.४० दरम्यान ब्लॉक असणार आहे. या कालावधीत सीएसएमटी/वडाळा येथून वाशी/बेलापूर/पनवेलसाठी सुटणाऱ्या डाऊन हार्बर मार्गावरील लोकल सेवा रद्द राहणार आहेत. याशिवाय वांद्रे/गोरेगाव येथून सीएसएमटीसाठी सुटणाऱ्या लोकल गाड्या देखील रद्द करण्यात येणार आहेत. तथापि, पनवेल आणि कुर्लादरम्यान विशेष लोकल सेवा २० मिनिटांच्या वारंवारतेने चालविण्यात येतील. गोरेगाव-वांद्रे अप-डाऊन हार्बर मार्गावर देखील ब्लॉक कालावधीत सर्व लोकल फेऱ्या रद्द करण्यात येणार आहेत. त्यामुळे प्रवाशांनी याबाबतची माहिती घेऊन प्रवास करण्याचा विचार करावा.