Housing Lottery in Thane: ठाण्यातील घरांच्या लॉटरीसाठी नवीन दर निश्चित

मुंबई: ठाण्यातील चितळसर मानपाडा येथील म्हाडा गृहप्रकल्पातील घरांच्या किमतींमध्ये बदल करण्यात आले आहेत. उपमुख्यमंत्री एकनाथ शिंदे यांनी २०२०-२१ च्या रेडी रेकनरनुसार घरांच्या किमती निश्चित करण्याचे आदेश दिले आहेत. यापूर्वी काढलेल्या लॉटरीमध्ये ४३४ लाभार्थ्यांना कायम ठेवण्यात येणार असून, उर्वरित घरांसाठी नव्या दराने लॉटरी काढण्याचे निर्देश देण्यात आले आहेत. त्यामुळे आता या गृहप्रकल्पातील घरांची लॉटरी एकदा पुन्हा होणार आहे, ज्यामध्ये नागरिकांना ४४ ते ४६ लाखांच्या दरम्यान घरं उपलब्ध होणार आहेत.

चितळसर मानपाडा येथील गृहप्रकल्पात एकूण ११७३ घरं विकसित करण्यात आली आहेत, ज्यामध्ये ९३८ घरांची लॉटरी १४ जुलै २०२५ रोजी काढण्यात आली होती. या लॉटरीमध्ये घरांच्या किमती २०२५-२६ च्या रेडी रेकनर दरानुसार आकारण्यात आल्या होत्या. याबाबत तक्रारींचा विचार करून सोमवारी म्हाडा कार्यालयात एक बैठक आयोजित करण्यात आली होती. या बैठकीत म्हाडाचे उपाध्यक्ष संजीव जयस्वाल, कोकण मंडळाचे मुख्य अधिकारी डॉ. विशाल राठोड आणि इतर प्रमुख अधिकारी उपस्थित होते. एकाच इमारतीतील समान क्षेत्रफळाच्या घरांच्या किमतींमध्ये भिन्नता आढळल्याने, सरसकट २०-२१ चा रेडी रेकनर दर ग्राह्य धरून किंमत निश्चित करण्याचे निर्देश देण्यात आले आहेत.