Earthquake tremors in Jawhar:जव्हार परिसरात भूकंपाचे धक्के भीतीने नागरिक रात्रभर जागे

पालघर जिल्ह्यातील जव्हार शहराजवळ काल रात्री १० वाजता भूकंपाचे धक्के बसल्याने संपूर्ण परिसरात भीतीचे वातावरण निर्माण झाले. ३.२ तीव्रतेच्या या भूकंपामुळे नागरिकांमध्ये घबराट पसरली आणि अनेकांनी रात्रभर जागून काढली. भूकंपाच्या धक्क्यामुळे कोणतेही मोठे नुकसान झालेले नाही, मात्र नागरिकांच्या मनात असुरक्षिततेची भावना निर्माण झाली आहे. भूकंपाच्या केंद्रबिंदूचा शोध घेतल्यास तो डेंगाचीमेट परिसरात असल्याचे समजले आहे. भूकंपाच्या धक्क्यानंतर नागरिक घराबाहेर येऊन रस्त्यावर थांबले. काही वेळाने, रात्री ११ वाजता ३.४ तीव्रतेचा दुसरा भूकंप झाला, ज्यामुळे नागरिकांची चिंता अधिक वाढली. या भूकंपाचे केंद्र हडे गावाजवळील श्री जगदंबा माता मंदिराच्या परिसरात असल्याचे सांगितले जात आहे. भूकंपाच्या या धक्क्यांमुळे कुत्र्यांकडून विचित्र आवाज काढले जात असल्याने नागरिकांमध्ये आणखी भीती निर्माण झाली. अनेकांनी मध्यरात्रीनंतर काही तास रस्त्यावर थांबण्याचा निर्णय घेतला. रात्री ११.३९ व मध्यरात्री १२.०५ वाजता आफ्टर शॉक जाणवले, ज्यामुळे नागरिकांमध्ये असुरक्षिततेची भावना वाढली. भूकंपाची तीव्रता सौम्य असल्याचे सांगितले जात असले तरी नागरिकांमध्ये चिंता कायम आहे.

जिल्हा आपत्ती व्यवस्थापन विभागाने या भूकंपाच्या घटनांची नोंद घेतली असून, नागरिकांमध्ये पसरलेले भीतीचे वातावरण कमी करण्यासाठी जव्हार परिसरात जनजागृती अभियान सुरू करण्यात येणार आहे. जिल्हाधिकारी यांनी संबंधित शासकीय यंत्रणांना सतर्क राहण्याचे निर्देश दिले आहेत. जव्हार परिसरात आपत्कालीन परिस्थितीचा आढावा घेण्यात येणार असल्याची माहिती प्रशासनाने दिली आहे. या भूकंपाच्या घटनांमुळे जवळपासच्या सापुतारा परिसरातही भूकंपाचे धक्के जाणवले. सापुतारा येथील शिंदे वर राहूदे गावांजवळ काल चार भूकंपाचे धक्के बसले. सकाळी ०७.५३ वाजता २.९ तीव्रतेचा, ०९.५० वाजता २.७ तीव्रतेचा, दुपारी ०२.३८ वाजता २.० तीव्रतेचा आणि रात्री ०९.३८ वाजता २.८ तीव्रतेचा भूकंप झाला. या भूकंपाचे प्रभावक्षेत्र पालघर जिल्ह्यातील जव्हार, मोखाडा व तलासरी भागात असल्याचे दिसून आले आहे.