Child Swallows Magnets:दोन वर्षांच्या चिमुरड्याने खेळण्यातील चुंबक गिळले; आतड्यांना पडली छिद्रे!

रोहा शहरात एक धक्कादायक घटना घडली आहे, ज्यात दोन वर्षांच्या चिमुरड्याने खेळण्यातील दोन शक्तिशाली चुंबक गिळले. यामुळे बालकाच्या आतड्यांना गंभीर इजा झाली असून, त्याला तातडीने शस्त्रक्रिया करावी लागली. सुरुवातीला बालकाला पोटदुखी, उलट्या आणि जुलाबाचा त्रास झाला होता, त्यामुळे डॉक्टरांनी ‘गॅस्ट्रोएन्टेरायटिस’चा संशय व्यक्त केला होता. मात्र, वेदना अधिक तीव्र झाल्यानंतर डॉक्टरांनी केलेल्या तपासणीत अपेंडिसायटिसची शक्यता दिसून आली. यामुळे तातडीने शस्त्रक्रिया करण्याचा निर्णय घेण्यात आला. शस्त्रक्रियेदरम्यान डॉक्टरांना बालकाच्या आतड्यांमध्ये दोन चुंबक अडकलेले आढळले, जे आतड्याच्या दोन वेगवेगळ्या भागांत अडकले होते. यामुळे आतड्यांवर प्रचंड दाब निर्माण झाला आणि लहान आतडे व ‘सीकम’ भागात छिद्रे पडली. यामुळे पोटात संसर्गजन्य दूषित द्रव साचला होता. डॉक्टरांनी तत्परतेने दोन्ही छिद्रे दुरुस्त करून पोटातील संसर्ग स्वच्छ केला आणि बालकाचे प्राण वाचवले. आठवडाभराच्या उपचारानंतर, बालकाला सुखरूप घरी सोडण्यात आले आहे.

या घटनेनंतर, पालकांना घरात त्याच प्रकारचे खेळणे आढळल्याने मुलाने त्यातील चुंबक गिळल्याचे स्पष्ट झाले. या चुंबकांचा बनाव ‘निओडिमियम’ या अत्यंत शक्तिशाली धातूपासून झाला आहे, ज्यामुळे त्यांचा धोका अधिक असतो. अशा प्रकारच्या चुंबकांचे अनेक तुकडे पोटात गेल्यास ते एकमेकांना आकर्षित होऊन आतड्यांना गंभीर इजा पोहोचवू शकतात. त्यामुळे खेळणी खरेदी करताना त्यांची सुरक्षितता तपासणे अत्यंत महत्त्वाचे आहे. लहान मुलांच्या खेळण्यांमधील छोटे भाग किंवा चुंबक सुटलेले नाहीत ना, याची पालकांनी विशेष खबरदारी घ्यावी आणि मुलांना अशा वस्तूंपासून दूर ठेवावे, असे आवाहन डॉक्टरांनी केले आहे. या घटनेने पालकांना जागरूक राहण्याची गरज असल्याचे स्पष्ट झाले आहे, कारण लहान मुलांच्या सुरक्षिततेसाठी योग्य काळजी घेणे अत्यंत आवश्यक आहे.