Distance Learning Postgraduate Course:दूरस्थ अभ्यासक्रमाद्वारे पदवी घेणाऱ्यांनाही एक वर्षांचाच पदव्युत्तर अभ्यासक्रम

मुंबई – दूरस्थ शिक्षण पद्धतीने चार वर्षांचा पदवी अभ्यासक्रम पूर्ण करणाऱ्या विद्यार्थ्यांना पदव्युत्तर शिक्षणासाठी दोन वर्षांचा अभ्यासक्रम पूर्ण करणे आवश्यक होते. परंतु, शिवसेना (ठाकरे) खासदार अनिल देसाई यांनी विद्यापीठ अनुदान आयोगाकडे (यूजीसी) एक वर्षाच्या पदव्युत्तर अभ्यासक्रमाची मागणी केली होती. याबाबत यूजीसीने सकारात्मक निर्णय घेतला असून, आता दूरस्थ पद्धतीने पदवी मिळवणारे विद्यार्थी देखील एक वर्षात आपले पदव्युत्तर शिक्षण पूर्ण करू शकतील. हे निर्णय विद्यार्थ्यांच्या शैक्षणिक भविष्याला एक नवा वळण देणारे आहे. यामुळे दूरस्थ शिक्षण घेणाऱ्या विद्यार्थ्यांना महाविद्यालयात उपस्थित राहण्याची आवश्यकता न राहता, त्यांच्या शैक्षणिक प्रगतीत गती येईल.

दिल्ली विद्यापीठाच्या ‘स्कूल ऑफ ओपन लर्निंग’ मध्ये दूरस्थ शिक्षण घेणाऱ्या विद्यार्थ्यांना चार वर्षांची पदवी पूर्ण केल्यानंतर एक वर्षाच्या एम.ए. अभ्यासक्रमात प्रवेश मिळत नव्हता. यामुळे, महाविद्यालयात शिक्षण घेणाऱ्या विद्यार्थ्यांना एक वर्षाच्या एम.ए. चा पर्याय उपलब्ध असताना, दूरस्थ विद्यार्थ्यांना दोन वर्षांच्या जुन्या अभ्यासक्रमासाठी प्रवेश घेण्यास भाग पाडले जात होते. यामुळे अनेक विद्यार्थ्यांना शैक्षणिक आणि आर्थिक अडचणींचा सामना करावा लागला. या गंभीर समस्येवर लक्ष वेधण्यासाठी अनिल देसाई यांनी युजीसीचे अध्यक्ष आणि शिक्षण मंत्रालयाच्या उच्च शिक्षण विभागाचे सचिव डॉ. विनीत जोशी यांना पत्र लिहून नियमावलीत सुधारणा करण्याची मागणी केली होती. यूजीसीने या मागणीला मान्यता दिली.