Need for 935 Teachers in Municipal Education Department:महापालिकेच्या शिक्षण विभागाला ९३५ शिक्षकांची गरज

मुंबई : नवीन शैक्षणिक वर्ष सुरू झाल्यानंतर दोन महिने उलटले तरी महानगरपालिकेच्या शाळांमध्ये शिक्षकांची संख्या अद्यापही अपुरी आहे. विद्यार्थ्यांच्या शैक्षणिक प्रगतीसाठी आणि कार्यरत शिक्षकांवरचा ताण कमी करण्यासाठी पालिकेने शिक्षक भरतीची प्रक्रिया सुरू केली आहे. शिक्षण विभागातील रिक्त पदे भरण्यासाठी पवित्र पोर्टलचा वापर करून शिक्षकांची भरती केली जाणार आहे. इच्छुक उमेदवारांना शिक्षण सेवक पदासाठी अर्ज करण्याची अंतिम तारीख ११ ऑगस्ट आहे. त्यामुळे, या पदांसाठी अर्ज करण्यास इच्छुक असलेल्या उमेदवारांनी लवकरात लवकर अर्ज करण्याचे आवाहन करण्यात आले आहे.

महानगरपालिकेच्या शाळांचा दर्जा आणि शैक्षणिक गुणवत्ता सुधारण्यासाठी शिक्षण विभागाने विविध उपाययोजना राबविल्या आहेत. तथापि, सध्या शिक्षकांची संख्या कमी असल्यामुळे शिक्षण व्यवस्थेवर ताण निर्माण झाला आहे. अनेक शाळांमध्ये विद्यार्थ्यांच्या संख्येच्या तुलनेत शिक्षकांची संख्या कमी असल्यामुळे विद्यार्थ्यांना अध्यापनात अडचणींचा सामना करावा लागत आहे. त्यामुळे, शाळांमध्ये दोन किंवा तीन इयत्तांमधील विद्यार्थ्यांना एकाच वर्गात शिकवण्याची परिस्थिती निर्माण झाली आहे, ज्यामुळे शिक्षणाची गुणवत्ता प्रभावित होत आहे.

शिक्षकांच्या अपुऱ्या संख्येमुळे पालिकेच्या शिक्षण विभागाला अनेक आव्हानांचा सामना करावा लागत आहे. यामुळे, महानगरपालिकेने पवित्र पोर्टलद्वारे ९३५ शिक्षकांची भरती करण्याचा निर्णय घेतला आहे. या भरती प्रक्रियेत मराठी, इंग्रजी, चित्रकला आणि संगीत यांसारख्या विषयांसाठी शिक्षकांची आवश्यकता आहे. शिक्षक सेवकांना १६ हजार रुपये मानधन देण्यात येणार आहे. या पदांसाठीची जाहिरात, आरक्षणाचे तपशील, शैक्षणिक अहर्ता आणि अटी व शर्ती याबाबत सविस्तर माहिती महापालिकेच्या संकेतस्थळावर उपलब्ध आहे. अर्ज प्रक्रिया ६ ऑगस्टपासून सुरू झाली असून इच्छुक उमेदवारांनी ११ ऑगस्टपर्यंत अर्ज सादर करणे आवश्यक आहे.