Educational Initiative in Nagpur: नागपूरमध्ये धम्म व विनयाचे शिक्षण सुरू

नागपूर : भारतातील विद्यार्थ्यांना धम्म व विनयाचे शिक्षण शालेय स्तरावर उपलब्ध करून देण्यासाठी थायलंडच्या धम्मकाया फाऊंडेशनने विशेष शैक्षणिक अभ्यासक्रम तयार केला आहे. या उपक्रमामुळे नागपूरच्या विद्यार्थ्यांना धम्म व विनयाचे धडे गिरवता येणार आहेत. याबाबतची माहिती थायलंडच्या वाट फ्रा धम्मकायोचे आंतरराष्ट्रीय संबंध प्रमुख भंते कित्तीपोंग हेमवंसो यांनी दिली. त्यांनी सांगितले की, या उपक्रमामुळे विद्यार्थ्यांना नैतिक मूल्ये, करूणा, शिस्त आणि जबाबदारी यांचा अभ्यास करता येईल, ज्यामुळे एक आदर्श व निरोगी समाज निर्माण होईल. यासाठी शैक्षणिक संस्थांमध्ये आणि घराघरांमध्ये धम्माचा प्रचार प्रसार होणे आवश्यक आहे. भंते कित्तीपोंग यांच्या नेतृत्वात कळमेश्वर रोडवरील शांतिवन चिचोली येथील धम्मजयो बुद्ध विहारामध्ये ९ आंतरराष्ट्रीय भिक्खूंचा तीन महिन्यांचा वर्षावास सुरू झाला आहे. यानिमित्त शनिवारी पत्रकारांशी संवाद साधताना त्यांनी या उपक्रमाबद्दल माहिती दिली.

भंते कित्तीपोंग यांनी यावेळी स्पष्ट केले की, आदर्श समाज निर्माण करण्यासाठी सर्व वयोगटांमध्ये नैतिक मूल्यांची जाणीव होणे आवश्यक आहे. या उपक्रमात इंडियन बुद्धिस्ट कौन्सिलसह सहकार्य केले जात आहे. यामुळे शांतिवन चिचोलीमध्ये ओपन युनिव्हर्सिटी सुरू करण्याची योजना आहे. यामुळे विद्यार्थ्यांना धम्म व विनयाचे शिक्षण घेण्याची संधी मिळेल. भंते कित्तीपोंग यांच्या सोबत भंते सुमंगल, भंते नठउथ भदरवरो, भंते फाईसिठ सतिमन्को, भंते अदुल सुखमनो, भंते फ्रा महा नठफोग धम्मविभुनो, भंते विरेंद्र धम्मकुठे, भंते गीन तेनवरो, भंते मनिष झायिनो यांच्यासह शांतिवन चिचोलीचे कार्यवाह संजय पाटील, प्रदीप लामसोंगे, चंद्रशेखर गणवीर, रेखा मून आदी उपस्थित होते.