NEET Exam Paper Leak CBI: महाराष्ट्रातील ३ विषयतज्ज्ञांचा ‘नीट’ पेपरफुटीतील सहभाग

नवी दिल्ली : नीट-यूजी २०२६ च्या परीक्षेतील प्रश्नपत्रिकेच्या माहितीचा उलगडा करण्यात राष्ट्रीय परीक्षा संस्थेच्या (एनटीए) तीन प्रमुख तज्ज्ञांचा समावेश असल्याचा आरोप सीबीआयने केला आहे. या तज्ज्ञांमध्ये पी. व्ही. कुलकर्णी (रसायनशास्त्र), मनीषा हवालदार (भौतिकशास्त्र) आणि मनीषा मांढरे (वनस्पतिशास्त्र, प्राणीशास्त्र) यांचा समावेश आहे. सीबीआयने २८ जुलै रोजी विशेष न्यायालयात १३ जणांविरुद्ध आरोपपत्र दाखल केले असून, या प्रकरणात पुण्यातील पी. व्ही. कुलकर्णी याच्या सोसायटीतील प्रवेश-नियंत्रण ॲपमधील नोंदी, बायोमेट्रिक माहिती, मोबाइल कॉल डिटेल रेकॉर्ड आणि लोकेशन विश्लेषण यांचा आधार घेतला आहे. या विशेष न्यायालयात सीबीआयने अंतिम दोषारोपपत्र सादर केले आहे, ज्यामध्ये या तिघांनी एनटीएच्या गोपनीय विभागातील सुरक्षेतील त्रुटींचा फायदा कसा घेतला याचा सविस्तर उल्लेख आहे. तपासात एनटीएच्या सुरक्षेत गंभीर त्रुटी आढळून आल्या आहेत, ज्या प्रश्नपत्रिका बाहेर जाण्यास कारणीभूत ठरल्या आहेत. गोपनीय विभागासाठी स्वतंत्र थेट निरीक्षण कक्ष नव्हता, त्यामुळे तज्ज्ञांच्या हालचालींवर लक्ष ठेवणे शक्य झाले नाही. प्रवेश आणि बाहेर पडताना झडतीची व्यवस्था नसल्यामुळे प्रश्नपत्रिका बाहेर जाण्याची संधी मिळाली, असा सीबीआयचा दावा आहे.

दोषारोपपत्रानुसार, पी. व्ही. कुलकर्णीने गोपनीय विभागात भाषांतर व पुनर्भाषांतराच्या कामासाठी तज्ज्ञांना कोरे कागद दिले होते. या कागदांचा वापर करून त्याने रसायनशास्त्रातील १३५ प्रश्न आणि उत्तरे लहान चिठ्ठ्यांवर लिहिल्याचा आरोप आहे. या चिठ्ठ्या लपवून त्याने गोपनीय विभागाबाहेर नेल्याची माहिती सीबीआयने दिली आहे. त्याचबरोबर, कुलकर्णीने तुलनेने सोपे प्रश्न पाठवले आणि हॉटेलमध्ये परतल्यानंतर ते पुन्हा लिहून काढले, असेही तपासात आढळले आहे. मनीषा मांढरे हिच्याकडे वनस्पतिशास्त्राच्या प्रश्नांची इंग्रजी-मराठी भाषांतराची जबाबदारी होती. हॉटेलमध्ये परतल्यावर ती संबंधित पाठ्यपुस्तकांतील परिच्छेद चिन्हांकित करत असे, ज्यामुळे प्रश्न आणि पाठ्यपुस्तकातील मजकूर यांची सांगड घालणे सोपे झाले, असा सीबीआयचा दावा आहे. मनीषा हवालदार हिने भौतिकशास्त्राच्या प्रश्नांची नोंद ठेवली होती, ज्यामुळे या प्रकरणात तिचा सहभाग स्पष्ट झाला आहे.