Incident at Day Care Center:डे केअर सेंटरमध्ये चिमुरड्याला प्लास्टिकच्या बाटलीने मारहाण

मुंबईच्या कांजूरमार्ग पश्चिमेतील एका डे केअर सेंटरमध्ये सात वर्षांच्या चिमुरड्यावर प्लास्टिकच्या बाटलीने हल्ला झाल्याची घटना समोर आली आहे. या घटनेबाबत चिमुरड्याच्या पालकांनी मनीषा वायंगणकर या महिला कर्मचाऱ्याविरोधात विक्रोळी पोलिस ठाण्यात तक्रार दाखल केली आहे. या घटनेत चिमुरड्याच्या वरच्या ओठाला गंभीर दुखापत झाली आहे, ज्यामुळे पालक चिंतेत आहेत. तक्रारदार स्मिथ कुबार पटेल यांच्या मुलाला शाळा सुटल्यानंतर दुपारी डे केअरमध्ये ठेवण्यात आले होते. ४ ऑगस्ट रोजी रात्री, जेव्हा मुलाची आई त्याला घेण्यासाठी गेली, तेव्हा तिने पाहिले की मुलाचा वरचा ओठ सुजलेला आहे. स्टाफने सांगितले की, मुलगा खेळताना पडला होता, पण घरी आल्यानंतर मुलाने आपल्या आईला सांगितले की, 'दीदीने प्लास्टिकची बाटली फेकून मारली'.

या घटनेनंतर पालकांनी मुलाला वैद्यकीय उपचारांसाठी रुग्णालयात नेले. दुसऱ्या दिवशी, पालकांनी डे केअरमध्ये चौकशी केली असता, त्यावेळी मनीषा वायंगणकर हिने मुलाला प्लास्टिकची बाटली फेकून मारल्याचे स्पष्ट झाले. या प्रकरणात वायंगणकर हिच्यावर गुन्हा दाखल करण्यात आला आहे आणि विक्रोळी पोलिसांनी पुढील तपास सुरू केला आहे. या घटनेमुळे डे केअरच्या सुरक्षेबाबत प्रश्न उपस्थित झाले आहेत. पालकांनी या प्रकारच्या घटनांवर कठोर कारवाईची मागणी केली आहे, जेणेकरून भविष्यात अशा घटनांना आळा घालता येईल.