Engineer to Gun Dealer: छ. संभाजीनगरात पिस्तुल विक्रीचे नेटवर्क उध्वस्त; ४ जण अटकेत!

छत्रपती संभाजीनगरमध्ये एका उच्चशिक्षित इंजिनिअरने बेकायदेशीर शस्त्रांची तस्करी करण्यास सुरुवात केली होती. उमर दुर्राणी या २५ वर्षीय तरुणाने धार्मिक भावना भडकावणाऱ्या कारवायांमध्ये सहभागी होऊन शहरात पिस्तुल विक्रीचे एक जाळे तयार केले. त्याने मित्रांच्या मदतीने गुलमंडीतील कपड्याच्या दुकानात काम करणाऱ्या दोघांना पिस्तुल विक्रीचे एजंट बनवले होते. या विक्रीत पिस्तुलांची किंमत ५० हजार ते एक लाख रुपयांपर्यंत ठरवण्यात आली होती, ज्यामध्ये दहा हजार रुपयांचे कमिशन दिले जात होते. या प्रकरणात गुन्हे शाखेने चार जणांना अटक केली असून, त्यांच्या ताब्यातून एक देशी बनावटीचे पिस्तुल आणि दोन जिवंत काडतुसे जप्त करण्यात आली आहेत.

शुक्रवारी दुपारी जटवाडा रोडवर पिस्तुल विक्रीसाठी येणाऱ्या दोघांबद्दल पोलिस उपनिरीक्षक अर्जुन कदम यांना गुप्त माहिती मिळाली. त्यानुसार, त्यांनी वरिष्ठ अधिकाऱ्यांना याची माहिती दिली आणि सापळा रचला. एका रुग्णालयाजवळ दुचाकीवरून येणाऱ्या दोन तरुणांना पोलिसांनी ताब्यात घेतले. या तरुणांमध्ये शेख शकिल शेख नाजिम (१९) आणि सय्यद अल्फाज सय्यद अहमद (२१) यांचा समावेश होता. शकिलच्या झडतीत त्याच्याकडे एक देशी बनावटीचे पिस्तुल आणि दोन जिवंत काडतुसे सापडली. त्यानंतर दोघांना चौकशीसाठी ताब्यात घेतले गेले. दोघेही गुलमंडी येथील एका मोठ्या कापड दुकानात काम करत होते, आणि त्यांच्या गुन्हेगारी कृत्यांमध्ये सामील होण्याचे कारण समोर आले आहे.