Fake Work Orders in Kumbh Mela: कुंभमेळ्याच्या बनावट वर्क ऑर्डर ; फसवणुकीचा आकडा ५०० ते ६०० कोटींवर..! मंत्री महाजन यांचा गौप्यस्फोट

जळगाव : नाशिक-त्र्यंबकेश्वरच्या कुंभमेळ्यातील कामांच्या संदर्भात बनावट कार्यारंभ आदेश देऊन मोठ्या प्रमाणावर आर्थिक फसवणूक करणाऱ्या रॅकेटचा पर्दाफाश झाला आहे. महसूल आयुक्त प्रवीण गेडाम यांच्या नावाने आणि ‘एस’ अक्षराची डिजिटल स्वाक्षरी असलेले बनावट कार्यारंभ आदेश तयार करून संबंधितांकडून कोट्यवधी रुपये उकळण्यात आले आहेत. कुंभमेळा मंत्री गिरीश महाजन यांनी सोमवारी जळगाव येथे पत्रकार परिषदेत याबाबत माहिती दिली. या फसवणुकीचा आकडा ५०० ते ६०० कोटी रुपयांपर्यंत पोहोचण्याची शक्यता आहे, असे त्यांनी स्पष्ट केले. कुंभमेळ्याच्या सुरक्षेसाठी नियुक्त केलेल्या पोलिसांना जेवण, पिण्याचे पाणी, चटया, बादल्या, चादरी आणि इतर साहित्य पुरवण्याच्या नावाखाली हे बनावट कार्यारंभ आदेश देण्यात आले आहेत. प्रत्येक आदेशाची रक्कम १०० ते १५० कोटींच्या आसपास असल्याचे महाजन यांनी सांगितले.

कुंभमेळ्याच्या कामांसाठी सामान्यतः ऑनलाइन निविदा प्रक्रिया राबवली जाते. मात्र, या प्रकरणात ज्यांना बनावट कार्यारंभ आदेश देण्यात आले, त्यांनी कोणतीही ऑनलाइन निविदा भरण्यात आलेली नाही. तरीही संशयितांनी संबंधितांकडून रोख आणि धनादेशाद्वारे पैसे उकळून त्यांना ऑफलाइन कार्यारंभ आदेश दिले. या आदेशांमध्ये शासनाच्या अधिकृत कार्यारंभ आदेशांसारखेच स्वरूप असल्याने अनेकांची फसवणूक झाली आहे. अधिकृत कार्यारंभ आदेशांवर क्यूआर कोड असतो, परंतु बनावट आदेशांमध्ये गेडाम यांचे नाव आणि ‘एस’ अक्षराची डिजिटल स्वाक्षरी वापरण्यात आलेली आहे. त्यामुळे या आदेशांची सत्यता तपासल्यानंतर मोठा षडयंत्र असल्याचा संशय बळावला आहे.