Digital Gold New Rules: फोनपे, गुगल पेवर १० रुपयांत सोने खरेदी करताय? सावधान! 'डिजिटल गोल्ड'बाबत सरकार आणणार नवीन नियम

सोने भारतीय संस्कृतीचा एक अविभाज्य भाग आहे आणि त्याला नेहमीच एक विशेष महत्त्व आहे. पारंपरिक दागिन्यांपेक्षा गुंतवणुकीच्या दृष्टिकोनातून देखील सोने महत्त्वाचे मानले जाते. मात्र, अलीकडे डिजिटल गोल्डच्या खरेदीकडे ग्राहकांचा कल वाढत आहे. मोबाईल अॅप्सद्वारे १० किंवा १०० रुपयांत सोने खरेदी करण्याची प्रक्रिया आता सामान्य झाली आहे. यामुळे केंद्र सरकारने डिजिटल गोल्डसाठी नवीन नियम लागू करण्याचा विचार सुरू केला आहे. आगामी वर्षांत या नियमांची अंमलबजावणी होण्याची शक्यता आहे, ज्यामुळे ग्राहकांच्या गुंतवणुकीला अधिक सुरक्षा मिळेल.

सध्या डिजिटल गोल्डमध्ये गुंतवणूक करताना ग्राहकांना कोणत्याही प्रकारचे कायदेशीर संरक्षण उपलब्ध नाही. हे सोने सुरक्षित ठिकाणी ठेवले जाते, असे सांगितले जात असले तरी, यावर कोणत्याही नियामक संस्थेचा देखरेख नाही. यामुळे ग्राहकांच्या गुंतवणुकीसाठी धोका निर्माण झाला आहे. यावर उपाय म्हणून, 'डिजिटल प्रेशियस मेटल्स ॲश्युरन्स कौन्सिल ऑफ इंडिया' या संस्थेने वित्त मंत्रालय, भारतीय रिझर्व्ह बँक आणि ग्राहक व्यवहार मंत्रालयासोबत अनेक महत्त्वाच्या चर्चासत्रांचे आयोजन केले आहे.