MNGCL's Road Excavation in Nashik: एमएनजीएलने नाशिकमध्ये किती रस्ते खोदले? १५०० किमीच्या आरोपावर कंपनीने दिले स्पष्टीकरण

नाशिक शहरात खड्ड्यांमुळे निर्माण झालेल्या गंभीर समस्यांवर चर्चा करण्यासाठी आयोजित विशेष सर्वसाधारण सभेत मोठा गदारोळ झाला. या सभेत शिवसेना (उद्धव ठाकरे) आणि राष्ट्रवादी (अजित पवार) यासह अपक्ष नगरसेवकांनी रस्त्यांच्या दुरवस्थेसाठी जबाबदार असलेल्या अधिकाऱ्यांवर कठोर कारवाईची मागणी केली. काही नगरसेवकांनी या समस्येसाठी महाराष्ट्र नॅचरल गॅस लिमिटेड (एमएनजीएल) आणि स्मार्ट सिटी कंपनीसह महापालिकेच्या बांधकाम विभागाला दोषी ठरवले. विशेषतः गॅस वाहिन्यांसाठी किती रस्ते खोदण्यात आले, याबाबतची माहिती सभेत समोर आली. खड्डे आणि खोदकामामुळे निर्माण झालेल्या धोकादायक परिस्थितीवर संताप व्यक्त करण्यात आला. महापौर हिमगौरी आहेर-आडके यांनी खड्ड्यांमुळे झालेल्या अपघातात मृत्यूमुखी पडलेल्या सहा व्यक्तींच्या कुटुंबांना प्रत्येकी पाच लाख रुपयांची आर्थिक मदत जाहीर केली. या घोषणेनंतर सभागृहात मृतांच्या कुटुंबियांना धनादेश देण्यात आले. तथापि, विरोधकांनी या मदतीच्या रकमेला आक्षेप घेत ती वाढवून १० लाख रुपयांची करण्याची मागणी केली. खड्ड्यांच्या समस्येवर लक्ष वेधण्यासाठी शिवसेनेचे नगरसेवक हाताला व डोक्याला बँडेज बांधून सभागृहात दाखल झाले, तर अपक्ष नगरसेवक मुकेश शहाणे आणि राष्ट्रवादीचे नगरसेवक रुग्णवाहिकेतून महापालिकेत आले. ठाकरे गटाच्या नगरसेवकांनी घोषणाबाजी केली, ज्यामुळे सत्ताधारी नगरसेवक आक्रमक झाले.

नाशिकच्या खड्डेमय स्थितीवर चर्चा करताना महापालिकेच्या बांधकाम विभाग, एमएनजीएलच्या खोदकामांमुळे निर्माण झालेल्या समस्यांवर बोट ठेवण्यात आले. खड्डे भरण्यासाठी कोल्ड मिक्सची निविदा उघडण्यात आलेली नाही, याबद्दल चिंता व्यक्त करण्यात आली. याशिवाय, स्मार्ट सिटीच्या कामांमुळे निर्माण झालेल्या गोंधळावरही चर्चा झाली. कुंभमेळा आयुक्तांना सभागृहात बोलावले गेले नाही, याबद्दल काही नगरसेवकांनी प्रश्न उपस्थित केला. खड्डे बुजवण्याच्या प्रक्रियेत प्रशासकीय हलगर्जीपणावर बोट ठेवण्यात आले. दरवर्षी खड्डे भरण्यासाठी वेळेत निविदा उघडली जात नाही, त्यामुळे खड्डे भरताना योग्य तंत्रज्ञानाचा वापर न करता मुरुम टाकला जात असल्याची तक्रार करण्यात आली. एमएनजीएल आणि स्मार्ट सिटीच्या खोदकामांचा फटका रस्त्यांना बसत असल्याचे स्पष्ट झाले आहे.