Announcement of Literary Awards:विठ्ठलराव विखे पाटील राज्यस्तरीय साहित्य पुरस्कार जाहीर

राहाता: सहकार चळवळीचे जनक आणि पद्मश्री डॉ. विठ्ठलराव विखे-पाटील यांच्या १२६ व्या जयंतीनिमित्त राज्यस्तरीय साहित्य, कलागौरव आणि प्रबोधन पुरस्कारांची घोषणा करण्यात आली आहे. यंदा पद्मश्री डॉ. विठ्ठलराव विखे साहित्य जीवनगौरव पुरस्कार ज्येष्ठ साहित्यकार उत्तम कांबळे यांना प्रदान केला जाणार आहे. त्याचप्रमाणे राज्यस्तरीय नाट्यसेवा पुरस्कार सचिन शिंदे यांना आणि कलागौरव पुरस्कार मालती इनामदार यांना देण्यात येणार आहे. पुरस्कार निवड समितीचे अध्यक्ष डॉ. रावसाहेब कसबे यांनी सोमवारी या पुरस्कारांची माहिती दिली. यंदा पुरस्कार वितरणाचे हे ३६ वे वर्ष आहे. विखे यांच्या जयंतीच्या दिवशी, म्हणजेच २७ ऑगस्टला प्रवरानगर येथे ९९ व्या अखिल भारतीय मराठी साहित्य संमेलनाचे अध्यक्ष विश्वास पाटील यांच्या हस्ते पुरस्कारांचे वितरण होणार आहे. या कार्यक्रमात जलसंपदा मंत्री राधाकृष्ण विखे, माजी मंत्री अण्णासाहेब म्हस्के आणि कारखान्याचे अध्यक्ष डॉ. सुजय विखे यांची उपस्थिती असणार आहे. निवड समितीत डॉ. रावसाहेब कसबे यांच्यासह डॉ. एकनाथ पगार, डॉ. दिलीप धोंगडे आणि प्रा. डॉ. राजेंद्र सलालकर यांचा समावेश आहे.

यावर्षी ज्येष्ठ साहित्यिक उत्तम कांबळे यांना साहित्य जीवनगौरव पुरस्कार देण्यात येणार आहे, ज्यामध्ये १ लाख रुपये आणि स्मृतिचिन्ह असे पुरस्काराचे स्वरूप आहे. त्यांच्या कार्याची दखल घेत, समाजातील शोषित व वंचित घटकांचे दुःख समजून घेत त्यांनी पत्रकारितेतून वाचनाऱ्यांसमोर आलेले अनुभव साहित्याच्या माध्यमातून मांडले आहेत. यामुळे त्यांच्या नावाची निवड करण्यात आली आहे. उत्कृष्ट साहित्य पुरस्कार ५१ हजार रुपये आणि स्मृतिचिन्हासह पुण्यातील संहिता राजन यांच्या 'चल गं सखे वारुळाला' या कथासंग्रहास देण्यात येणार आहे. याशिवाय सुरेंद्र दरेकर यांच्या 'समर ऑफ सेव्हेंटी नाईन' या कादंबरीस विशेष साहित्य पुरस्कार २५ हजार रुपये आणि स्मृतिचिन्ह दिले जाणार आहे. नाट्य दिग्दर्शक सचिन शिंदे यांना नाट्यसेवा पुरस्कार आणि ज्येष्ठ तमाशा कलावंत मालती इनामदार यांना कलागौरव तमाशा कलावंत पुरस्कार २५ हजार रुपये आणि स्मृतिचिन्हासह देण्यात येणार आहे.

मराठी भाषेसाठी समर्पित कार्य करणारी संस्था म्हणून मराठी अभ्यास परिषद या संस्थेस 'प्रबोधन पुरस्कार' २५ हजार रुपये आणि स्मृतिचिन्ह देण्यात येणार आहे. 'खटपट' या आत्मचरित्राचे लेखक निवृत्ती जोरी यांना जिल्हास्तरीय साहित्य पुरस्कार १० हजार रुपये आणि स्मृतिचिन्ह देण्यात येणार आहे. याशिवाय डॉ. संजय गोर्डे यांच्या 'शांतीच्या शोधात' या पुस्तकास उत्तेजनार्थ साहित्य पुरस्कार ५ हजार रुपये आणि स्मृतिचिन्ह जाहीर करण्यात आले आहे. या पुरस्कारांद्वारे साहित्य, कला आणि प्रबोधन क्षेत्रातील महत्त्वपूर्ण कार्याची दखल घेतली जात आहे.