Shocking Incident in Chandrapur:पित्याने दोन मुलांच्या गळ्यावर धारदार शस्त्राने हल्ला केला

चंद्रपूर शहरात सोमवारी रात्री एक धक्कादायक घटना घडली, ज्यात एका पित्याने आपल्या दोन मुलांच्या गळ्यावर धारदार शस्त्राने वार केले. दुर्गापूर येथील शक्तीनगर परिसरात घडलेल्या या घटनेत सात वर्षीय देवांश बदखल याचा मृत्यू झाला, तर त्याचा ११ वर्षीय भाऊ सुशांत गंभीर जखमी झाला आहे. सुशांतवर जिल्हा सामान्य रुग्णालयात उपचार सुरू आहेत. या प्रकरणात मंगेश बदखल (४०) याला पोलिसांनी ताब्यात घेतले असून, घटनेचा तपास सुरू आहे. घटनास्थळी पोहोचलेल्या पोलिसांनी तातडीने जखमी मुलाला रुग्णालयात दाखल केले, मात्र देवांशचा उपचारादरम्यान मृत्यू झाला. या घटनेने परिसरात एकच खळबळ उडाली आहे.

पोलिसांच्या प्राथमिक माहितीनुसार, मंगेश बदखल आपल्या दोन मुलांसह त्याचा भाऊ राहुल बदखल यांच्या निवासस्थानात राहत होता. राहुल वेकोलिमध्ये काम करत असून, मंगेश ऑटोरिक्षा चालवून कुटुंबाचा उदरनिर्वाह करीत होता. मंगेशची पत्नी काही काळापूर्वी त्याला सोडून गेली होती आणि तो तिला पुन्हा घरी आणण्यासाठी प्रयत्न करत होता. मात्र, त्यात यश न आल्याने तो मानसिक तणावात असल्याची माहिती समोर आली आहे. या तणावातूनच त्याने आपल्या मुलांवर हल्ला केला असावा, अशी चर्चा आहे. तथापि, हल्ल्यामागील नेमके कारण अद्याप स्पष्ट झालेले नाही.