Police Action in Malegaon:मालेगाव पोलिसांचा धडाका; वर्षभरात ४७७ छापे, ७५० आरोपींवर कारवाई अन् ३ कोटींचा मुद्देमाल जप्त!

मालेगाव शहरात कायदा व सुव्यवस्था राखण्यासाठी पोलिसांनी गेल्या वर्षभरात कठोर कारवाया केल्या आहेत. साहाय्यक पोलीस अधीक्षक सिद्धार्थ बारवाल यांच्या मार्गदर्शनाखाली ४ ऑगस्ट २०२५ ते ३ ऑगस्ट २०२६ या कालावधीत ४७७ छापे टाकण्यात आले. या छाप्यात ७५० संशयितांना अटक करण्यात आली असून, एकूण ३ कोटी ९ लाख ५५ हजार ४२ रुपयांचा मुद्देमाल जप्त करण्यात आला आहे. या कारवायांमुळे गुन्हेगारीच्या कण्यावर मोठा प्रहार करण्यात आला आहे. पोलिसांनी ड्रग्जच्या व्यापारावर नियंत्रण ठेवण्यासाठी विशेष मोहीम राबवली, ज्यामध्ये ‘एनडीपीएस’ कायद्यांतर्गत ३२ कारवायांमध्ये ६३ संशयितांना अटक करण्यात आली. यामध्ये एमडी पावडर, कोडीन सिरपच्या १८३३ बाटल्या, अल्प्रझोलमच्या १७,७६५ गोळ्या आणि गांजा यांचा समावेश आहे, ज्याची एकूण किंमत २५.८२ लाख रुपये आहे. याशिवाय पवारवाडी पोलीस ठाण्यात या गुन्ह्यातील आरोपींवर ‘मकोका’ अंतर्गत कारवाई करण्यात आली आहे.

पोलिसांनी ‘आर्म्स ॲक्ट’ अंतर्गत ५४ कारवायांमध्ये ८० आरोपींकडून १९ गावठी कट्टे, २० जिवंत काडतुसे, ३० तलवारी, कोयते आणि इतर घातक शस्त्रे जप्त केली आहेत. याशिवाय प्राणी संरक्षण कायद्यानुसार १३१ कारवायांमध्ये ३९० जिवंत गोवंश आणि ११,९०० किलो मांसासह वाहने जप्त करण्यात आली, ज्याची एकूण किंमत १.९६ कोटी रुपये आहे. प्रतिबंधित गुटख्याच्या ३४ कारवायांमध्ये ३७.५६ लाखांचा मुद्देमाल जप्त करण्यात आला, तर जुगाराच्या १०० धाडींमध्ये २७४ आरोपींवर कारवाई करण्यात आली आहे. या सर्व कारवायांमुळे शहरात गुन्हेगारीवर नियंत्रण ठेवण्यात पोलिसांना यश मिळाले आहे.