Arms Smuggling in Madhya Pradesh: मध्य प्रदेशातून आणलेली देशी बनावटीची ११ पिस्तुले जप्त, तिघांना अटक

सांगली येथील स्थानिक गुन्हे अन्वेषण विभागाने मध्य प्रदेशातील हत्यार तस्करांशी संपर्क साधून विक्रीसाठी आणलेली ११ देशी बनावटीची पिस्तुले जप्त केली आहेत. या कारवाईत तिघांना अटक करण्यात आली आहे, अशी माहिती पोलीस अधिक्षक तुषार दोशी यांनी शुक्रवारी दिली. जप्त केलेल्या पिस्तुलांची किंमत ७ लाख २० हजार रुपये असून, त्यासोबत २२ जिवंत काडतुसे आणि २ मॅगझीनसुद्धा जप्त करण्यात आले आहेत. या प्रकरणात अटक केलेले आरोपी मयुरेश मनोहर आदाटे, मारूती अशोक गुजले आणि वैभव उर्फ गब्बर संजय इंगळे आहेत. अद्याप या हत्यारांचा पुरवठा करणारा पाजी नावाचा व्यक्ती पोलीसांच्या हाती लागलेला नाही, जो मध्य प्रदेशातील रहिवासी आहे.

स्थानिक गुन्हे शाखेचे पोलीस निरीक्षक संजीव झाडे यांनी अवैध शस्त्रांच्या तस्करीविरुद्ध कठोर कारवाई करण्याच्या सूचना दिल्या होत्या. सहायक निरीक्षक प्रशांत निशाणदार यांच्या पथकाला माहिती मिळाली की, आदाटे हा कंबरेला पिस्तुल लावून आटपाडी ते भिवघाट रस्त्यावर थांबला आहे. पथकाने तातडीने त्या ठिकाणी जाऊन त्याला ताब्यात घेतले आणि झडती घेतली. झडतीदरम्यान त्याच्याकडून देशी बनावटीचे पिस्तुल सापडले. अधिक चौकशी केल्यानंतर आदाटेने गुजले याच्याकडून पिस्तुल विकत घेतल्याचे सांगितले. त्यानंतर गुजले याला पकडण्यासाठी पोलीसांनी तातडीने छापा टाकला आणि त्याला ताब्यात घेतले. गुजलेने इंगळे यांच्याकडून आणलेली तीन पिस्तुले आणि जिवंत काडतुसे पोलिसांनी जप्त केली.